Nutaarsiassat


2017 2016 2015 Flere år...

16-08-2017

Inatsisartut Siulittaasuata Lars-Emil Johansenip ulloq 16. august 2017 Elisibánguaq Jensen, Ilulissat, sølviusumik Nersornaaserpaa

Inatsisartut Siulittaasoqarfiata Elisibánguaq Jensen Ilulissani sølviusumik Nersornaaserpaat inuiaqatigiinni kikkunnut tamanut atugassarititaasut pitsanngorsarniarlugit ukiorpassuarni qasusuilluni suliniarsimanera nersorniarlugu.

 

Inatsisartut Siulittaasuata Lars-Emil Johansenip Elisibánguaq Jensenimut oqaaseqarnermini ilaatigut erseqqissarpai:

 

Arnatut nakuusutut, qanilaartutut inuiaqatinnullu maligassiuilluartutut oqaatigineqarputit.

 

G-60-ip innuttaasunik ineriartorfiusunut katersuutsitsinissamik siunertaqartup ingerlanneqarnerata nassatarisaanik ilaatigut nunaqarfiit imminnut akilersinnaanngitsutut nalilerneqartut ineriartornermi tunulliunneqarsimapput. Naak Saqqaq nunaqarfinnut taakkununnga ilaagaluartoq ilaatigut Saqqami innuttaasut innaallagissiorfissaannik, aalisakkerivimmik aalisaartut tunitsivissaannik nunaqarfimmiullu imertartarfissaannik pilersitseqataasimavutit, soorluttaaq nunaqarfimmi atuarfiup allissutissaanik suliniuteqartunut siuuttuusimasutit. Iliuutsitit tamarmik nunaqarfippit suli ullumikkut napaneranut nunatsinnilu nunaqarfiit ingerlalluartut akornanniinneranut pissutaaqataapput.

 

Ilaatigut 25-inik ukioqarlutit angajoqqaat sinniisaannut ilanngussimanerit kingornalu piffissami 1975-imiit 1989-imut kommunalbestyrelsimut ilaasortaasimanerit Saqqami ukiorpassuarni maluginiarneqaatigisimavatit.

 

 

Siulittaasoqarfik sinnerlugu

 

Lars-Emil Johansen

Inatsisartut Siulittaasuat