Kommuninik Nakkutilliisoqarfik


Kalaallit Nunaanni Kommuninik Nakkutilliisoqarfiup nakkutigissavaa kommunalbestyrelsinit ingerlatsinerminni inatsisartut inatsisaat malinneqarneqarnersut taamatuttaarlu   maleruagassat taakkununnga atasut malinneqarnersut kissalu pisortani maleruagassat atuuttut naapertorlugit kommunini aqutsineq ingerlatsinersoq.

 

Kommuninik Nakkutilliisoqarfiup katitigaanera sulineralu pillugit malittarisassat Kommunit aqunneqarnerat pillugu Inatsisartut inatsisaat nr. 22, 18. november 2010-meersuni aalajangersarneqarsimapput. (ulluinnarni aqutsinermut inatsit).


Kommuninik nakkutilliisoqarfik makkuninnga inuttaqarpoq:

Siulittaasoq, Nunatta eqqartuussisuuneranik toqqarneqarsimasoq aammalu inatsisinut tunngassutilinnut ilinniakkamik naammassisaqarsimasoq.

Ilaasortat marluk, Inatsisartunut qinersinerup kingorna inatsisartunit toqqarneqartussat.

Kommunalbestyrelsimut ilaasortat marluk kanokuka-mit kommuninut qinersinerup kingorna toqqarneqartussat.

 

Peqatigisaanik ilaasortat tamarmik sinniisussaannik toqqaasoqassaaq.

 

Siulittaasup imaluunniit minnerpaamik ilaasortat pingasut piumasaqarnerisut pisariaqartitsinerlu naapertorlugu akulikitsigisumik ataatsimiinneq ingerlanneqartassaaq.

 

Kommuninik nakkutilliisoqarfimmut Naalakkersuisunit allatseqarneq  isumagineqassaaq.

 

Qinigaaffimmut piffissaq:

Qinersinerup nutaap kinguneranik Inatsisartuni ivertissuulluni ataatsimiinnermut atatillugu ilaasortat taakkualu sinniisussaat toqqarneqassapput.

 

Pisariaqartitsineq tunngavigalugu ilassutissanik qinersisoqartassaaq.