Kukkunersiuinermut Ataatsimiititaliaq ataasinngormat inissitsiterpoq tassungalu atatillugu kukkunersiuisumit Inatsisartunit toqqakkamit uku tigullugit Naalakkersuisunut ilaasortat Namminersorlutik Oqartussanut il.il. akiligassaqarnerannik misissuineq, 3. novembari 2014 aamma Naalakkersuisunut ilaasortat Namminersorlutik Oqartussanut akiligassaat pilugit malinnaatitsilluni suliaq, 7. novembari 2014

Inatsisartut oqaluuserisassanut ataatsimiititaliarigallagaata ullumi ataatsimiinnermini aalajangerpaa Inatsisartut inissititernissaminnut ataatsimiigiaqquneqassasut tallimanngornermi ulloq 12. december 2014 nal. 11.00.

September 2014-imi missingersuutinik malittarinninneq Aningaasaqarnermut Ataatsimiitita-liamit ullumi oqaluuserineqarpoq. Missingersuutinik malittarinninnerup imarai 2014-imi qaammatini siullerni qulingiluani isertitat aningaasartuutillu misissuiffigineqarnerat.

Minnerunngitsumik ulluni kingullerni innuttaasut akornannit kissaateqartoqartarsimavoq misissuinermit nalunaarusiap Kukkunersiuinermut Ataatsimiititaliaasimasup Deloittemut suliareqqusimasaata tamanut saqqummiunneqarnissaanik. Misissuinermi piffissap 2009-mi januaarip ulluisa aallaqqaataanniit 2013-imi decembarip ulluisa 31-iannut pineqarnissaa naatsorsuutigineqarpoq, ullumikkut siusinnerusukkullu Naalakkersuisunut ilaasortaasimasut immikkut sammillugit, tamatumalu saniatigut Deloitte nammineq naliliinini malillugu pissutsit allat attuumassuteqarsinnaasut pisariaqarpat ilanngussinnaallugit. Inatsisartut Allattoqarfiat sinnerlugu matumuuna ilisimatitsissutigineqassaaq qinersinerup kingorna Kukkunersiuinermut Ataatsimiititaliamik nutaamik qinersisoqarnissaata tungaanut inatsisitigut periarfissaqanngimmat misissuinermit nalunaarusiap tamanut saqqummiunnissaanut.