Allakkanik nassiussuisarnermut tapiissuteqartarneq pillugu apeqqut misissuataarniarlugu Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliap kingullermik ataatsimiinnermini aalajangiuppaa taamaattumillu nuna tamakkerlugu aviisit saqqummersartut marluusut aaqqissuisuinik ataatsimeeqatiserinnilluni. Saaffiginnissut akuersaarneqarluartoq ataatsimiititaliamit paasineqarpoq neriuutigineqarporlu piaarnerpaamik ataatsimiittoqarsinnaassasoq.

Kiisalu atuakkanik kalaallisuunik saqqummersitsisarnermi nalinginnaasumik atugassarititaasut ataatsimiititaliap misissorniarpai taamaattumillu ukiaanerani ataatsimiinnerup ingerlanerani atuakkiortut peqatigiiffianik ataatsimeeqateqalersaarlutik. Ilanngulluguttaaq Atuakkiorfiup matumeqarnerata kingorna atuakkanut kalaallisuunut arlalissuarnut piginnittussaatitaanerup kikkunnit tigummineqarnera ilaatigut qulaajarneqassasoq ataatsimiititaliamit kissaatigineqarpoq.

Paasissutissat annertunerusut – Ataatsimiititaliap siulittaasua Naaja Nathanielsen (+299) 29 57 04 imaluunniit siulittaasup tullia Juliane Henningsen (+299) 48 41 48 attavigineqarsinnaapput.