Great Greenlandip sinniisui Aningaasaqarnermut Ataatsimiititaliamit ataatsimeeqatigineqarput

 

Great Greenlandip sinniisui ullumi ulloq 19. januar 2006-imi Aningaasaqarnermut Ataatsimiititaliamut sassartinneqarput. Great Greenlandimit najuupput Direktør Michael Nielsen siulersuisunut siulittaasoq Anders Jonas Brøns. Kingullertut taasaq telefonikkut peqataavoq.

 

Ataatsimeeqatigiinneq pitsaasumik angusaqarfiusumillu ingerlanneqarpoq aammalu Aningaasaqarnermut Ataatsimiititaliap Great Greenlandillu sinniisuisa akornanni oqallinneq ammasumik pilluni. Great Greenlandimit paasissutissiissutigineqartut tamakkiisuusutut naammaginartutullu Aningaasaqarnermut Ataatsimiititaliamit isumaqarfigineqarput.

 

Sassartitaqareernermi oqaluuserinninneq tunngavigalugu Naalakkersuisunut apeqqutinik amerlanngitsunik paasissutissiisinnaasunik saqqummiussinissaq ataatsimiititaliap pisariaqartippaa.

 

Puisit amiinik Canadameersunik eqqussuinerup unitsinneqarnissaanik Naalakkersuisut 6. januar 2006-imi aalajangiinerannut tunuliaqutaasup tamatumalu kingunerisinnaasaasa erseqqinnerusumik paasissutissiissutigineqarnissaat ataatsimiititaliap immikkut kissaatigaa.

 

Tamatuma saniatigut puisit pisarineqartarnerat amiisalu tunisassiarineqartarnerat pillugu apeqqutip tusagassiorfinnit sammineqarnerata pissusissamisuunngitsumik ingerlanera tunngavigalugu siunissami taama pisoqaqqissinnaanera pinngitsoorniarlugu tusagasseeriaatsit naalakkersuinikkullu anguniakkat suut Naalakkersuisunit atorneqalersaarnerat pillugu erseqqinnerusumik paasitinneqarnissani ataatsimiititaliap kissaatigaa.

 

Paasissutissanik annertunerusunik pissarserusukkaanni mailadressit telefonnormullu uku atorlugit Aningaasaqarnermut Ataatsimiititaliap ilaasortai attavigineqarsinnaapput:

 

Ellen Christoffersen (Siulittaasoq) tlf.: +299 48 26 72 imaluunniit e-mail ekri@gh.gl.

Tommy Marø (siulittaasup tullia) tlf.: +299 54 84 88 26 72 imaluunniit e-mail toma@gh.gl.

Jens Lars Fleischer tlf. +299 54 91 60 imaluunniit e-mail jefe@uummannaq.gl

Johan Lund Olsen tlf. +299 55 54 85 imaluunniit e-mail johan@gh.gl

Lene Knüppel tlf. +299 49 11 66 imaluunniit e-mail lekn@gh.gl.

Esmar Bergstrøm (Lene Knüppelimut sinniisussaq) tlf. +299 55 33 80 imaluunniit e-mail  esmar@gh.gl

Otto Jeremiasen (Jens Lars Fleischerimut sinniisussaq) tlf. +299 87 22 01 imaluunniit e-mail otje@kangaatsiaq.gl.

Inussiarnersumik inuulluaqqusillunga

 

 

Ellen Christoffersen

Aningaasaqarnermut Ataatsimiititaliap siulittaasua