Inatsisartut Aningaasaqarnermut Ataatsimiititaliaat piffissami 28. august – 4. september 2009-mi missingersuutit pillugit ukiumoortumik isumasioqatigiippoq. Isumasioqatigiinneq Ilulissani ingerlanneqarpoq.

Missingersuutit pillugit isumasioqatigiinnermi aningaasanut inatsisissatut siunnersuut nutaaq ataatsimiititaliamit ataatsimut misissorneqarlunilu oqallisigineqarpoq. Tamanna tunngavigalugu Naalakkersuisunut apeqquterpassuarnik saqqummiussinissani ataatsimiititaliap naatsorsuutigaa. Ataatsimiititaliat susassaqartut aningaasanut inatsisissatut siunnersuummut oqaaseqaataasa Aningaasaqarnermut Ataatsimiititaliap sulinerani ilanngunneqarnissaat siunertaralugu apeqqutit Inatsisartut ataatsimiititaliaannut saqqummiunneqarnissaat naatsorsuutigineqarpoq.

Naalakkersuisut akissuteqaataat ataatsimiititaliallu susassaqartut ilanngussaat ilaatigut aningaasanut inatsisissatut siunnersuutip aappassaaneerneqarneranut Aningaasaqarnermut Ataatsimiititaliap isumaliutissiissusiornerani tunngavissaalluassapput ilaatigullu Inatsisartut partiivisa aningaasanut inatsit pillugu isumaqatigiinniarnissaannut tapertaassallutik. Apeqqutit aningaasanut inatsisissatut siunnersuutip aappassaaneerneqarneranut Aningaasaqarnermut Ataatsimiititaliap isumaliutissiissutaanut ilanngullugit pisarnertut tamanut saqqummiunneqassapput.

Ilulissaniinnermi Qaasuitsup kommuniata aningaasaqarnermut ataatsimiititaliaa angusaqarfiulluartumik ataatsimiititaliamit ataatsimeeqatigineqarpoq, tamatumani kommunip aningaasaqarnikkut inissisimanera aammalu kommunip 2010-mi aningaasaqarnerata ineriartorneranut naatsorsuutigisat oqallisigineqarlutik. Tamatuma saniatigut ataatsimiititaliap takuniarpai Royal Greenlandip raajaleriffiutaa, Pædagogisk-Psykologiske Rådgivning (PPR) kiisalu Mathias Storchip aammalu Jørgen Brønlundip atuarfii. Takuniaanerit tamarmik paasissutissanik pissarsiffiulluarput.

Inatsisartut Aningaasaqarnermut Ataatsimiititaliaata isumasioqatigiinnerani ilaasortat makku peqataapput:

Akitsinnguaq Olsen (Siulittaasoq) (IA)       

Niels Thomsen (Siulittaasup tullia) (D)       

Hans Aronsen (IA)

Per Berthelsen (S)

Harald Bianco (IA) – Naaja Nathanielsenimut sinniisussaq.

Annertunerusumik paasisaqarusukkaanni Aningaasaqarnermut Ataatsimiititaliap siulittaasua mailikkut akiol@inatsisartut.gl saaffigineqarsinnaavoq