Siulittaasoqarfiuniartup uparuaaneranut oqaaseqaat 

Inatsisartut Siulittaasoqarfiat Inatsisartunut tamarmut Siulittaasoqarfittut atuuttariaqarpoq. Nalitsinnilu Nunatsinni taamaattoqanngilaq.

Siulittaasoqarfik naalakkersuisooqatigiit partivinut maneruutiinnarpoq, tamannalu Demokraatit siulittaasuata Per Berthelsenip uparuarusussimavaa. Uparuaaneq naalakkersuisooqatigiit partiivisa pingasuusut malunnarluinnartumik narraatigisaat.

Inatsisartut Siulittaasoqarfiat sinnerlugu siulittaasup tulliata siulliup Agathe Fontain-ip 8. maj 2006-imi tusagassiuutitigut nalunaaruteqarnerat malillugu allatut nassuiaatissaqanngilaq. Tusagassiuutitigut nalunaarut paatsoorneqarsinnaanngitsumik uppernarsaasoq Per Berthelsenip Inatsisartut Siulittaasoqarfianik uparuaanerminni ilumoorsimasoq.

Tusagassiuutitigut nalunaarummi tusarliunneqarpoq Inatsisartut Siulittaasoqarfiat sinnerlugu nalunaarutaasoq. Tamanna kukkunerulluinnarpoq. Tusagassiuutitigut nalunaartut naalakkersuisooqatigiit partiivi Siumut, IA aamma Atassut sinnerlugit malunnartumik nassiussaavoq. Inatsisartut Siulittaasoqarfiat sinnerlugu nassiunneqarsimasuuppat Siulittaasoqarfiup ataatsimiinnerani sammineqarsimassagaluarpoq. Ataatsimiinnermi partiit ilaasortaatitaqartut tamarmik najuuffigisimasussaagaluagaat. Taamaa ittumik ataatsimiittoqarsimanngilaq. Akerlianik 8. maj Inatsisartut Siulittaasoqarfiani ataatsimiittoqanngilaq, taamaalilluni tusagassiuutitigut nalunaarutip imarisaa nassiunneraluunniit pillugu Siulittaasoqarfik tamarmiusoq ilisimatinneqarani.

Demokraatit ilalernanngilluinnartutut isumaqarfigaat Siumut, IA aamma Atassut sammisaqarfik Inatsisartut Siulittaasoqarfiat Demokraatit Siulittaasuannik taama sakkortutigisumik uparuaaffittut atormassuk. Partiit Per Berthelsen uparusukkunikku tikilluaqqunarput, taamaassappalli partiitut namminersortutut imaluunniit Naalakkersuisooqatigiit Arsarnerit taaguusiullugit taamaaliorniarlik.

Isertuussaanngilaq Demokraatit Siulittaasoqarfimmilu ilaasortat sinnerisa akornanni imminnut attuumassuteqarnerat maannakkorpiaq ilungersunartoq. Sapaatimmi akunneri marlussuit kingulliit pisimasut nassatarisaannik Inatsisartut Siulittaasoqarfiata suliassaminik sapigarinnginninnera pillugu Demokraatit tatiginninnerat annikitsuararsuuvoq.

Tamanna tunngavigalugu Demokraatit piumasarissavaat Inatsisartut Suleriaasiat piaarnerpaamik nutarterneqassasoq nalitsinnullu tulluussarneqarluni.

Demokraatit Inatsisartuni gruppiat sinnerlugu,

Inussiarnersumik inuulluaqqusillunga

Palle Christiansen

Gruppeformand