Nunatsinni sullitat amerlasuut utoqqaat illuinut inissinneqarsimasariaqanngikkaluartut immikkut suliniuteqarfiginerat aallartinneqassaaq. Inersimasut tarnimikkut erloqissutillit immikkut angerlarsimaffissaannik pilersitsinissaq anguniarneqarpoq.

 

Tamanna Ilaqutariinnermut Ataatsimiititaliap aalajangiiffigisassatut siunnersuummik UPA 2007/8-mik suliarinninneranut atatillugu Ilaqutariinnermut Ataatsimiititaliamit isumaqatigiittup Inatsisartunut tamarmiusunut pingaarnertut oqariartuutigalugulu kaammattuutigaa.

 

Inatsisartuni partiinit siunnersuutit arlallit, tamarmik utoqqaat illuinut utoqqarnut naatsorsuussanut attanneqarsinnaanngitsumik inissiinernut amerlasuunut tunngasuusut Inatsisartunit Ilaqutariinnermullu Ataatsimiititaliamit ukiuni kingullerni suliarineqarsimapput.

 

Nassuiaat inersimasunut tarnimikkut erloqissuteqartunut immikkut angerlarsimaffinnik pisariaqartitsinermik qulaajaasussaq 2007-imi martsip naanerani Ilaqutariinnermut Ataatsimiititaliap qangali ujartugaa kiisami pissarsiarineqarpoq.

 

Inuit ikinnerpaamik 69-it nunatsinni utoqqaat angerlarsimaffiini naapertuutinngitsumik inissinneqarsimasut nassuiaammi takutinneqarpoq.

 

Ilaqutariinnermut Ataatsimiititaliap siunnersuummut isumaliutissiissutaani ilaatigut makku oqaatigineqarput:

 

Siunnersuut tulluartuullunilu ullutsinnut naleqquttuusoq nassuiaatikkut uppernarsarneqarpoq. Nunatsinni tarnimikkut napparsimasunut paaqqutarinnittarfittut angerlarsimaffimmik pilersitsinissamik pisariaqartitsineq saqqummiunneqartoq annertuvoq pisariaqartitsinerlu annertusiartorsinnaalluni.

Pineqartut tamaasa eqqarsaatigalugit kukkusumik inissiisimanikkut artukkersuutaasut Ilaqutariinnermut Ataatsimiititaliamit assorsuaq eqqumaffigineqarput innuttaasunullu inersimasunut tarnimikkut nappaatilinnut paaqqutarinnittarfittut angerlarsimaffinnik pisariaqartitsisoqarnera Ilaqutariinnermut Ataatsimiititaliamit aalajangiusimaneqarpoq. 

 

Annertunerusumik paasisaqarusukkuit ¿Ilaqutariinnermut Ataatsimiititaliami ilaasortat attavigisinnaavatit:

 

Inatsisartunut ilaasortaq Olga P. Berthelsen, Siulittaasoq, Telefon: 34 62 62/55 33 68 Inatsisartunut ilaasortaq Emilie Olsen; Siulittaasup tullia, telefon: 34 62 58

Inatsisartunut ilaasortaq Agnethe Davidsen telefon: 34 62 24

Inatsisartunut ilaasortaq Ruth Heilmann telefon: 34 62 30

Inatsisartunut ilaasortaq Astrid Fleischer Rex telefon: 34 62 44