Inatsisartuni Kulturip Unnuata ingerlanneqarnissaanut pilersaarut

Arfininngornermi ulloq 28. januar 2006, nal. 19.00-mit 22.00-mut Inatsisartuni Kulturip Unnua.

 

Misigissaq tupaallannarsinnaasoq, isumassarsiffiusinnaasoq tupigusutsitsisinnaasorlu!

 

Unnuarissat mikisut angisuullu Kulturip Unnuani  Kalaallit Nunaata Inatsisartoqarfianut Inatsisartut tikilluaqqorujumavai. Nummi Kulturip Unnuata ingerlanneqarnissaani Inatsisartut matu kingumut aammaarlutik ammarpaat. Tamanna pissaaq arfininngornermi 28. januar, nal.19.00-mit 22.00-mut.

 

Tamat oqartussaaqataanerannik aqutsisut suliffeqarfiata kiisalu Inatsisartuni partiit naalakkersuinikkut suliaqartuisa naapinnissaannut periarfissaq ukioq kingulleq pulaartunit uuntritilinnit arlalinnit atorneqarpoq. Ukioq manna aamma inuppassuit takuniaanissaat Inatsisartunit naatsorsuutigineqarpoq.

 

Unnuk taanna Inatsisartut ataatsimiittarfiata takunissaanut, oqaluttarfimmi nikorfanissamut, naalakkersuinikkullu suliaqartup nuannarisap issiaviani issianissamut immaqaluunnit naalakkersuinikkut suliaqartumik oqaloqateqarnissamut periarfissaqassaaq. Partiit naalakkersuinermik suliaqartut matutik ammatissavaat.

 

Oqaluttarfimmi isiginnaartorpassuaqarlutit nikorfanissat sinnattorisarsimaviuk? Taamaaliornissamut periarfissaq ammarpoq. Kulturip Unnuani oqaluttarfik illit nammineq misilissinnaanngorpat.

 

Inatsisartut kaffisortarfianni, tassa naalakkersuinikkut suliaqartut isersimaartarfigisaanni kaffi, tii tamulugassallu sassaalliutigineqassapput. Nalunaaquttap akunnerisa affai tamaasa kalaallisut qallunaatullu Inatsisartuni sulinermik paasissutissiinertalimmik Inatsisartut inaataanni eqqumiitsuliat ilisaritinneqartassapput.

 

Tamat oqartussaaqataanerat, naalakkersuinermik suliaqarneq kiisalu Inatsisartuni sulineq pillugit ilisimasatit misilerakkit. Inatsisileritooq apeqquteqarfigiuk: Nunatsinni inatsimmut tunngasumik apeqqutit sukkasuumik, eqqortumik arlaannaanullunniillu attuumassuteqanngitsumit akissuteqarfigitiguk - assersuutigalugu inatsisissatut siunnersuummik saqqummiussinermit siunnersuutip pingajussaaneerneqarnissaata tungaanut inatsisiliornerup ingerlanneqartarnera paasisaqarfigiuk. Inatsisartut Allattoqarfiata immikkoortortai tamarmik peqataatitaqassapput Inatsisartunilu sulineq pillugu oqaloqatigineqarsinnaallutik.

 

Inuusuttut Inatsisartui pillugit filminik Inatsisartut ataatsimiittarfiini takutitsisoqassaaq kiisalu tamat oqartussaaqataanerat pillugu seqersittakkanik takutitsisoqassalluni akissarsiassaqarluni unammisitsinertalimmik.

 

Inatsisartut Ataatsimiittarfiat kaffisortarfiallu amerlasuut TV-ikkut takoriigaannik qalipakkanik kusanartorpassuarnik peqarput. Takuniaasut namminneerlutik paasisassarsiorsinnaaqqullugit Kulturip Unnuani eqqumiitsuliat pingaaruteqarnerit naatsumik allaaserineqarnerannik imalimmik quppersagaaqqamik tunineqarsinnaapput.

 

Aggerlutit naalakkersuinermik suliaqartut suliffeqarfiat misigisaqarfigiuk - ilisimasatit misilerakkit: Tallimanik kusanartunik eqqugassaqarpoq.

Pilersaarutit annertunerusumik uani paasisaqarfigisinnaavatit: www.nanoq.gl

 

Paasissutissinneqarnissaq pillugu saaffigineqarsinnaavoq:

Ataatsimiititaliami allatsi

Anja Hynne Nielsen

Tlf.: 34 53 51 imaluunniit 48 61 62

E-mail: ahni@gh.gl