Inatsisartut Aalisarnermut, Piniarnermut Nunalerinermullu Ataatsimiititaliaat piffissami qulaani taaneqartumi Qaqortumut, Narsamut Narsarsuarmullu paasisassarsiorluni angalavoq. Ullutsinni nunatsinni nunalerinermik suliaqarnermi inuuniarnikkut atugassarititaasut qanimut paasisaqarfigiumallugit Ataatsimiititaliap aamma savaateqarfiit arlallit pulaarpai. Naalakkersuisut nunalerinermut naalakkersuinikkut nassuiaatissaq Inatsisartunit oqallisigineqartussaammat Ataatsimiititaliap angalaneranut aammattaaq aallaavigineqarpoq. Taamaattumik Ataatsimiititaliap kujataani nunaatileqarfiit takuniarumasimavai.

Ataatsimiititaliap maannangaaq paasivaa ullumi nunatsinni nunalerinermi illuutinut atortussanullu allanut  aningaasaliisarnermi kinguaattoorneqartoq. Taamatut aningaasaliisarnermi kinguaattoorneq Ataatsimiititaliap naliliineratut inuussutissarsiornerup ineriartornissaraluata periarfissaanut akornutaasuuvoq.

Siunissamissaaq nunatsinni nunalerinermik inuussutissarsiutip atugassarisaasa qulakkeerneqarnerisigut ineriartorteqqinneqarsinnaanerat Ataatsimiititaliap pingaartippaa. Taamaalillunilu inuussutissanik nunatsinneersunik nammineq annertunerusumik pilersorsinnaanissap siuarsarnissaa nerisassat avataaniit tikisinneqartartut ikilisinneqarsinnaanerat siunissami anguniagassatut eqqarsaatigineqarpat.

Nunatsinni nunalerinermut atugassarititaasunut killiliussat aammalu nammineq pilersornerup annertusineqarnissaanut siunissamut ungasissumut periarfissat akornanni ataqatigiinneqartoq Ataatsimiititaliap takusinnaavaa.

Inussiarnersumik inuulluaqqusillunga

Ane Hansen

Ataatsimiititaliap siulittaasua

Paasissutissat annertunerusut:

Aneh@ia.gh.gl

Mobil 53 61 58