Inatsisartut nittartagaat 2023-mi aggustip ulluisa 22-annit nutaamik isikkoqalissaaq tamatumunngalu atatillugu aqunneqariaasitoqaa nutarterneqarpoq nittartagarlu nutaamik ilusilersorneqarluni.

Amerlasoorpassuartigut nittartakkap nutaap aaqqissuussaanera pisoqqamut assinguvoq paasissutissallu nittartagatoqqamiissimasut tamarmik suli pissarsiarineqarsinnaallutik.

Nittartagaq Inatsisartut ataatsimiittarfianni ataatsimiinnerit eqqarsaatigalugit sulinermi sakkuuvoq pingaarutilik, soorlu aamma nittartagaq Inatsisartut ataatsimiinnerisa nalaanni Inatsisartunut ilaasortanut ulluinnarni sulinerminni sakkussaasa ilagigaat. Nittartakkap nutaap ilusilersorneqarnerata taamatuttaaq atuisartut Inatsisartut avataanniittut nittartakkami paasissutissanik takujuminarnerusumik ajornannginnerusumillu alakkaanissaannut periarfissippai.

Inatsisartuni sulineq eqqarsaatigalugu nittartakkamut immikkoortunik nutaanik ilanngussisoqarsimavoq. Taamaalilluni nalunaarusiat nassuiaatillu Inatsisartut aalajangiineri tunngavigalugit Naalakkersuisunut upernaakkut ataatsimiinnermut ukiakkulluunniit ataatsimiinnermut suliareqquneqarlutillu tunniuteqquneqarsimasut ataatsimut takuneqarsinnaalerput.

Nalunaarusiat nassuiaatillu tamakku kingusinnerusukkut Inatsisartut ataatsimiinneranni aalajangersimasumik oqaluuserineqarneq ajormata, amerlanertigulli paasissutissarpassuarnik Inatsisartut avataanni aamma soqutigineqarsinnaasunik imaqartarmata, taakku maanna nittartakkami nalunaarusianut nassuiaatinullu ingerlaqqiffissami ataatsimiinnernullu ingerlaqqiffissami aariaannanngortinneqarput.

Nittartakkami pitsanngorsaatit amerlasuut teknikikkut pitsanngorsaataapput, nittartagarli aamma oqinnerusutut nutaaliaanerusutillu isikkoqalerluni kusanarnerulersinneqarpoq. Nittartagatoqaq ilusitoqqamisut iluseqarluni 2008-miit atuussimavoq, taamaattumillu nittartakkap nutaap isikkua nalitsinnut naleqqunnerulluni. Nittartakkamik namminermik nutarterineq 2023-mi februaarimiilli ingerlasimavoq.

Taamaalilluni nittartakkami atortussat pissarsiariuminarnerulernissaannik kissaateqarneq tunngavigalugu nittartagaq nutarterneqarpoq ukiakkullu ataatsimiinnerup aallartinnginnerani tamanut saqqummiunneqarluni. Nittartagaq taamatuttaaq qarasaasiaaqqanit oqarusuaatinillu angallattakkanit iserfigiuminarnerulersinneqarsimavoq.

Kim Kielsen

Inatsisartut Siulittaasuat