Inatsisartut Nunanut allanut Sillimaniarnermullu Ataatsimiititaliaata New York-imut Washington-imullu paasisassarsiorluni angalanera

 

Inatsisartut Nunanut allanut Sillimaniarnermullu Ataatsimiititaliaat ulluni 12.-22. maj 2006 New York-imut Washington-imullu paasisassarliorni angalasimavoq.

 

Angalanerup pingaaarnertut siunertaraa Naalagaaffiit Peqatigiit Nunap Inuvii pillugit Ataatsimiittartoqatigiivisa tallimassaaneerluni Naalagaaffiit Peqatigiinni New York-imi katersuunnerani peqataanissaq. Ataatsimiititaliaq aammataaq Kalaallit Nunaata USA-llu akunnerminni atassuteqataat pillugit ataatsimeeqateqaqattaarpoq ilaatigut niiveqatigiinnermi apeqqutit, attaveqaatit kiisalu angallannikkut attaveqaatit sammineqarlutik.

 

Ataatsimiittartoqatigiit tallimassaaneerlutik katersuunneranni Danmarki Kalaallillu Nunaat sinnerlugit ataatsimiititaliami siulittaasuugallartoq Johan Lund Olsen oqalugiarpoq. Ilaatigut Kalaallit Nunaata Danmarkillu akunnerminni namminersulernissaq pillugu isumaqatigiinniarneri ingerlasut kiisalu silap pissusaata allanngoriartorneri oqalugiaammini sammivai. Oqalugiaat ilassilluarneqarpoq Ataatsimiittartoqatigiillu siuliattaasuata Victoria Tauli-Corpuz-ip akissummini naqissuserpaa Kalaallit Nunaata Danmarkillu pineqartumi suliniarnerat asssorsuaq qujamasuutigineqartoq.

 

Danmark-ip Naalagaaffiit Peqatigiinni aallartitaata Ellen Margrethe Løj-ip Naalagaaffiit Peqatigiinni sillimaniarneq pillugu Ataatsimiititaliaanni sulineq, Sillimaniarneq pillugu Ataatsimiittartoqatigiinni danskit ilaasortaanerat, Ukiuni tuusintilikkaani anguniakkat kiisalu Naalagaaffiit Peqatigiinni  iluarsartuusseqqinnermik sulineq, nunap inuvii kiisalu Nalagaaffiit Peqatigiit FN pillugu Ataatsimiititaliamut paasissutissiivoq. Naalagaaffiit Peqatigiit Nunap inuvii pillugit Ataatsimiittartoqatigiivinik kiisalu Sametinget-ip siulittaasuata tullianik Johan Mikkel Sara-mik kiisalu ICC-ip IWGIA-miillu aallartitat tamanut attuumassutilinnut apeqqutinik ullutsinni pisunik Ataatsimiititaliap oqalliseqatigivai. Nunap inuviisa naalakkersuinermik suliaqartuisa Ataatsimiittartoqatigiinni sinniisoqarnerannut apeqqut ilanngullugu.

 

Maj 2007-imiit Kangerlussuarmiit Baltimore/Washington-imut Air Greenlandip timmisartuussisalernerata ammarneqarnissaa tunngavigalugu Baltimore-p Mittarfia Ataatsimiititaliamit takuniarneqarpoq. Ataatsimiititaliaq Mittarfiup atortorissaarutai pillugit paasissutissiivigineqarpoq siunissamilu periarfissat soqutiginartut isumaqarluni.

 

Washington D.C.-imi Pentagon aamma Nunamut namminermut Naalakkersuisoqarfik (US Department of State) Ataatsimiititaliamit takuniarneqarpoq.  Pentagon-imi nunat tamalaat akornanni sillimaniarnikkut unammilligassat tamatumalu ataani Kalaalit Nunaannut attuumassutai pillugit Ataatsimiititaliaq paasissutissiivigineqarpoq kiisalu Permanent Committee-imi aammalu Joint Committee-imi sulineq pillugu. Missilit atorlugit illersornissap killiffii pillugit Missile Defense Agency-imit Ataatsimiititaliaq paasissutissiivigineqarpoq. Pituffimmi annikilliliinissanut apeqqutit pillugit Ataatsimiititaliaq eqqissisarneqarpoq suliffissat sapinngisamik attatiinnarniarneqartut uppernarsaavigineqarluni .

 

Kalaallit Nunaata Alaskallu suleqatigiinnissamut siunissami periarfissai kiisalu nukissiutit pisuussutinillu atuineq, silap pissusaata allanngoriartorneri, oqaatsitigut ajornartorsiutit kiisalu ungasiaaniit ilinniartisineq Alaska-p Guvernøriata Murkowski-p nunanut tamalaanut tunngatillugu siunnersortaanik Senator Murkowski-imut Senator Steven-imullu oqaloqatigiissutigineqarput.

 

Nunat tamalaat akornanni naalakkersuinikkut ineriartorneq pillugu tamatumalu ataani Kalaallit Nunaannut immikkut pingaarutillit pissutsit pillugit Ataatsimiititaliaq Nunami namminermut Naalakkersuisoqarfimmit paasissutissiivigineqarpoq. Kalaallit Nunaata USA-llu akornanni aningaasaqarnikkut suleqatigiinnissamut periarfissat Niivernermut Naalakkersuisoqarfimmut (Department of Commerce) pulaarnermi oqaloqatigiissutigineqarsinnaasimapput, tassunga ilaallutik Joint Committee-imi sulinermut tunngasut,; Kalaallillu Nunaata 2005-imi Whasington-imi inuussutissarsiutinik siuarsaaneranut  malitseqartitsinerani kiisalu 2007-imi Baltimore-imut Air Greenland-ip  timmisartukkut ingerlaarfissatut nutaamik periarfissaani, Niivernermut Naalakkersuisoqarfiup peqataaffigisai (Departement of Commerce). Joint Committee-ip suliniutinik suleqatigiisutissanillu tigussaasunik aallartissimasaanik amerlasuunik Ataatsimiititaliaq nuannaarutiginnippoq.

 

Inatsisartut Nunanut allanut Sillimaniarnermullu Ataatsimiitialiaanit angalanermi peqataapput:

Inatsisartunut ilaasortaq Johan Lund Olsen (Inuit Ataqatigiit)

Inatsisartunut ilaasortaq Marie Fleischer (Demokraatit)

Inatsisartunut ilaasortaq Tommy Marø (Siumut, Lars-Emil Johansenimut sinniisussaq)

 

Annertunerusunik paasisaqarusuttut ¿ ataatsimiititaliap siulittaasorigallagaa, Johan Lund Olsen,  oqarasuaat: +299 55 54 85-mut attavigineqarsinnaavoq