Namminersornerullutik Oqartussat nersornaasiuttagaata Nersornaatip sølviusup Johan Motzfeldtimut, ulloq 15. april 2006 Hotel Qaqortumi nalliuttorsiualaarnermi tunniunneqarnerani Inatsisartut Siulittaasuata, Jonathan Motzfeldtip oqalugiaataa

Asasara Johan Motzfeldt

Illit qaaqqusatillu Namminersornerullutik Oqartussat nersornaasiuttagaata Ner-sornaatip sølviusup tunniunneqarnerani tikilluaqqusinnaagassi nuannaarutigeqaara. Sivisuumik tunniusimalluarlutillu nunatsinnut ilaqutaasumik sulilluarsimaninnut taamatut nersorniarneqarputit.

Nersorneqaatissatit akuffigisarsimasatillu amerlaqaat. Tamakku maani tamakkerlugit taagussanngilavut, handilimili sulisimanerit sivisoqaaq, inuiaqatigiinnilu naatsorsuutigineqarsinnaasutut akuulluartarsimavutit. Illilli nuannaartorisatut maligassiuisutullu nunatsinnut pingaarutilimmik immikkut ilisimaneqaatitit taasaqarfigitsiarniarpakka.

15-inik ukioqarlutit Kongelige Grønlandske Handelimi, KGH-mi, niuernermut ilinniartunngorputit. Tamanna pivoq junip 17-iani 1955 Qassimiuni; tassani handelsasistentitut kingusinnerusukkullu niuertorutsimut taartaasartutut atorfeqarsimavutit.

1971-imi Qeqertarsuarmut niuertorusinngoriartorputit. Tamatuma kingorna Qassimiuni, Niaqornaarsummi Attumilu niuertorusiusimavutit. Ukiorpassuarni inuussutissarsiummik ingerlatsivinni ukiuni kingullerni 15-ini Attumi nunaqarfimmut niuertuusimavutit. Ukiutoqaq 2003 nunaqarfimmi niuertuunerit naggaserpat. Ukiuni 48-ini affarmilu sulineq nalliuttorsiornermik qummoroortarnermillu naggaserneqarmat nuannersimassaqaaq.

Suliffigisimasanni tamani ilisarisimaneqarluarsimalersimavutit. Ataqqineqarlutillu eqiasueqalutillu inuiaqatigiinnut sullissisimavutit.

Ilinnut Johan Motzfeldtimut Nersornaat sølviusoq manna Siulittaasoqarfiup qujaniarneranut takussutissaali. Nuannaaqalunga tulluusimaarlungalu Namminersornerullutik Oqartussat sinnerlugit Nersornaat matumuuna ilinnut tunniuppara.

Uummatinnit qutsavigaakkit pilluaqqullutillu.