Namminersornerullutik Oqartussat nersornaasiuttagaannik Nersornaammik sølviusumik Maniitsumi persuarsiualaarnermi Ane Marie Møllerip ulloq 28. juli 2006 nersornaaserneqarnerani Siulittaasup tulliisa sisamaata Ruth Heilmannip oqalugiaataa.

Asasara Ane Marie Møller,

Namminersornerullutik Oqartussat nersornaasiuttagaannik Nersornaammik sølviusumik nersornaaserneqarninni persuarsiualaarnermut illit qaaqqusatillu tikilluaqqusinnaagassi nuannaarutigeqaara. Kulturitta ilaata ammerinermut mersornermullu tunngasortaata ingerlatiinnarneqarnissaanik sivisuumik suliniarsimanerit pillugu taamatut nersorniarneqarputit.

Ukiukillutilli anaanaarussimavutit qatanngutitillu ukiukinnerit paarisaralugillu ataatat aalisartuullunilu piniartuusoq ikiugarisimavat. Imminut ¿ilinniartissimavutit¿ akisussaaffiillu ilinnut isumagisassanngortitat pilertortumik pikkorissuuffigilersimallugit.

Uiniaarsimavutit 13-inillu qitornartaarsimallutit. Uiit aalisartuullunilu piniartuusoq tapertaqartikkumallugu aningaasaqarniarnikkut ikiuussimavutit ammerinermut amernillu mersornermut imissutinik suliaqartarsimallutit.

Assassukkatit kusanartut assigiinngitsorpassuusut, maani Maniitsumiiinnaanngitsoq nunatsinnili tamarmi ilisimaneqaatigaatit. Ukiorpassuarni ammerineq taakkuninngalu suliaqarneq ilisimaneqaleqqullugit puigorneqaqqunagillu piginnaasatit ilinniartitsissutigisarsimavatit. Tamakkuninnga suliaqarnermi piginnaanitit ilisimasaqarluarnerillu amerlasuut iluaqutigisarsimavaat suliallu eqqortumik suliarineqartariaqarnerat paasissallugu ilinniartitsinnaassutsikkut paasiuminarnerulertarsimavoq.Ukiorpassuarni Arnat Peqatigiinnut ilaasortaavutit ataqqinaammillu ilaasortanngortinneqarsimallutit.

Suliniarninni inoqatinnut maligassiuiartuuvutit, amerlaqaallu ikiuukkumatussutsinnik qanilaartuuninnit allanillu qiimmassaasarninnik iluaquteqartarsimasut. Ullumerpiarlu 80-inik ukioqalerlutit inuuissioraluarlutit nammineq illunni suli najugaqarputit ukioqqortugaluarlutillu imminut isumagisinnaanerit pingaartitaralugu.

Qitornavittaaq, taakkulu kinguaavisa, misilittagarpassuatit iluaqutigisimaqaat. Ilaqutariit tamarmik inuiattut assuutinik peqarnissaat pingaartitariuarpat, taamaammallu assatit uninngaannanngisaannarsimapput. Qaqutikkut unillatsiaraangavit imminut eqiasuttutut isumaqarfigisarsimavutit. Sammisassaaleqinngisaannartuusimavutit.

Namminersornerullutik Oqartussat sinnerlugit nersornaasiuttagaq una Nersornaat sølviusoq, Ane Marie Møller, maannakkut ilinnut tunniussara Inatsisartut Siulittaasoqarfiata qujaniarneranut takussutissaali.

Qujanarsuaq pilluarillu.