Ullormut oqaluuserisassat

Ullormut oqaluuserisassanut nassuiaat.

Pisortat ataatsimoortumik allaffissornerisa aaqqissugaanerannut atatillugu naliliinissamut ataatsimiititaliarsuarmik pilersitsisoqarnissaanut Naalakkersuisut peqquneqarnissaannut Inatsisartut aalajangiiffigisassaattut siunnersuut. Maanna suliassaasut aallaavigalugit allaffissornerup annertussusaa ataatsimiititaliarsuup nalilersussavaa, suleriaatsit sunniuteqarluarnerusut pilersinnissaannut immikkoortortaqarfiillu suliassaqarfiillu (sektorit) akimorlugit suleqatigiinnerup pitsanngorsaaviginissaanut periarfissat misissussallugit, kiisalu allatut aaqqissuussinissamut periarfissanik siunnersuuteqarluni. Siunnersuutini tamani inatsisit ingerlatsinermut tunngasut qasukkartinneqannginnissaat aallaaviussaaq. Ataatsimiititaliarsuaq inunnit sektorinit assigiinngitsuneersunit inuttaqassaaq, tassa pisortat sektoriineersut aamma namminersortut sektoriineersut ilaasortat misilittagaqartut amerlaqatigiissallutik. Ataatsimiititaliarsuaq assigiinngissitaartuneersunit ilaliussanik sulisitaqassaaq, sulininilu ukiut marluk iluanni naammassissallugu. Tamatuma kingorna ataatsimiititaliarsuup innersuussutai Inatsisartuni politikkikkut suliarineqassapput.

Immikkoortuni Namminersorlutik Oqartussat kommunillu akuuffigisaanni marloqiusamik allaffiossornerup pinngitsoortinneqarnissaanut, ataatsimut suleriaatsit pisariillisarnissaannut isumalluutillu avitseqatigiissutigineqarnissaannut periarfissat qulaajaaffigalugit Naalakkersuisut nassuiaammik UKA2021-mut saqqummiussinissamik peqquneqarnissaannik Inatsisartut aalajangiiffigisassaatut siunnersuut.

Uunga siunnersuut: Ilinniartut sungiusartullu atorfinitsinnerini suliffiit pisortanilu oqartussat inuiaqatigiinni akisussaaffeqarnerat pillugu Inatsisartut inatsisaat nr. xx, xx. xxx 2019-imeersoq.

Cigarittikut taamatullu cigarittit kimmivikui utertittartussanngorlugit qularnaveeqquserneqartalernissaasa iluaqutissartai ajoqutissartaalu misissuivigeqqullugit Naalakkersuisut peqquneqarnissaannik Inatsisartut aalajangiiffigisassaattut siunnersuut. Misissuinerup inernera Inatsisartunut saqqummiuteqquneqarpoq kingusinnerpaamik UKA 2020-mi ataatsimiinneq aallartippat.

Meeqqanut suli atualinngitsunut perorsaanikkut inerikkiartuutaasunik ulluunerani neqeroorutit pillugit Inatsisartut inatsisissaanni §9 imm. 1 allanngorteqqullugu Naalakkersuisut peqquneqarnissaannik Inatsisartut aalajangiiffigisassaattut siunnersuut. Taamaalilluni meeqqat illugiimmik angajoqqaallit, tamarmik sulisimappata imaluunniit ilinniartuuppata, kommunep ulluunerani paaqqinniffiinut ulluuneranilu paarsisarfinnut utaqqisut allattorsimaffianni meeqqanut kisimiittunik angajoqqaalinnut sulisimappata imaluunniit ilinniartuuppata assigiimmik pineqarnissaat angujumallugu.

Meeqqanut suli atualinngitsunut perorsaanikkut inerikkiartuutaasunik ulluunerani neqeroorutit pillugit Inatsisartut inatsisissaat allanngorteqqullugu Naalakkersuisut peqquneqarnissaannik Inatsisartut aalajangiiffigisassaattut siunnersuut. Inatsisip allanngortinneratigut qulakkeerneqassaaq, kalaallit nunani allani ilinniartut qitornaasa kommunip meeqqeriviutaanut ulluuneraniluunniit angerlarsimaffinni paaqqinnittarfinnut utaqqisunut allanut naleqqiullugu sallinngortinneqartalernissaat ilinniartup Kalaallit Nunaanni sullivimmi imaluunniit oqartussaaffiit arlaanni sulilernissaminut isumaqatigiissuteqarluni takutissinnaappagu.