§ 33 malillugu siunnersuutinut akuersissutigineqartunut atatillugu nalunaarutit nassuiaatillu UPA-mi saqqummiunneqartussat

Inoqarfinnut isorliunerusuniittunut nunaqarfinnullu periarfissat pillugit inuttut ilanngaammut, nuna tamakkerlugu akileraarutip appasinneruneratigut, ilinniarnermilu taarsigassarsiniarnermi taarsersuinermut iluaqusersuinerit il. il. nunatsinni atulersinnaanerat pillugu Norgemi Finnmarkimut atugassaritinneqartut isumassarsiorfigalugit Naalakkersuisut misissueqqullugit peqquneqarnissaannik Inatsisartut aalajangiiffigisassaattut siunnersuut. Misissuinermi periutsit taamaattut nunatsinni atuutsinneqalersinnaanerannut aningaasaqarnikkut allaffissornikkullu pisortanut, namminersortunut innuttaasunullu aningaasatigut malitsigisassaat ilaatinneqassapput. Misissuinerup inerneri kingusinnerpaamik UPA2023-imi inatsisartunut agguaanneqariissapput.
Siumumi Inatsisartunut gruppiat

Nunatsinni illoqarfinni avinngarusimasuniittuni peqqissaaviit minnerni nakorsaqarniarneq aammalu peqqinnissaqarfimmi sulisunik amigaateqarneq pillugu Naalakkersuisut UPA2023 nallertinnagu nassuiaasioqquneqarnissaannik Inatsisartut aalajangiiffigissaassaattut siunnersuut.
Naleqqap Inatsisartunut ilaasortaatitai

Nunatsinni qimussertarnermik kulturip ineriartortinneqarnissaanut tammatsaaliorneqarnissaanullu Arctic Nomads innersuussutai 22-vit isumassarsiorfigalugit periusissiornissamik Naalakkersuisut peqquneqarnissaannik Inatsisartut aalajangiiffigisassaattut siunnersuut. Periusissiaq sapinngisamik qimmeqarfinnik ataasiakkaanik suleqateqarluni suliarineqassaaq. Periusissiaq kingusinnerpaamik UKA2023-imi saqqummiunneqassaaq.
Inatsisartunut ilaasortaq Doris Jakobsen Jensen, Siumut

Meeqqat 18-nit inorlugit ukiullit kinguaassiuutitigut atornerlunneqarsimasut, taakkununngalu angajoqqaajusut/akisussaasut, tarnip nakorsaanik piaartumik ikiorserneqarnissamik periarfissaqalernissaannik pisinnaatitaaffeqalernissaat pillugu nassuiaasioqqullugit Naalakkersuisut peqquneqarnissaannik Inatsisartunut aalajangiiffigisassatut siunnersuut. Misissuineq periuserineqarsinnaasunik saqqummiussisussaq piviusunngornissaanullu pisariaqartinneqartunik takussutissiisussaq, tamatumani aningaasatigut allaffissornikkullu kingunissai ilanngullugit, kingusinnerpaamik UKA2023-qarnerani Inatsisartunut tunniunneqassaaq.
Inatsisartunut ilaasortaq Anna Wangenheim, Demokraatit

Kommune Qeqertalimmi aallaaveqartussamik piniarnermut aalisarnermut nakkutilliisumik 2023 aallarnerfigalu atorfeqartitsilernissaq siunertaralugu Naalakkersuisut peqquneqarnissaannik Inatsisartut aalajangiiffigisassaattut siunnersuut.
Inatsisartunut ilaasortaq Kristian Jeremiassen, Inuit Ataqatigiit

Ukioq 2025-imiit nutaamik umiarsuarmik sinersortaateqalernissaa siunertaralugu Naalakkersuisut pilersaarummik suliaqarnissaannik Inatsisartut aalajangiiffigisassaattut siunnersuut, taamaasilluni pilersaarut kingusinnerpaamik UKA 2023-imi saqqummiunneqassalluni.
Inatsisartunut ilaasortaq Anders Olsen, Siumut

Innuttaasut peqqissutsikkut sullinneqarsinnaanissaat anguniarlugu cubameersuni peqqinnissaqarfimmi sulisunik sulilersitsiniaanissamut suliniut unitsinneqarallarsimasoq aallarnisaqqinnissaa anguniarlugu Naalakkersuisut peqquneqarnissaanik Inatsisartut aalajangiiffigisassaattut siunnersuut. Aallarnisaaneq 2022 naatinnagu pissaaq.
Inatsisartunut ilaasortaq Anna Wangenheim, Demokraatit

Innuttaasut peqqinnissaqarfillu akunnerminni tatigeqatigiinnerat ataqqeqatigiinnerallu annertusarnissaa anguniarlugu atorfillit atuisullu oqaloqatigiinnerat annertusarnissaa anguniarlugu peqqinnissaqarfinni immikkoortortaqarfinnilu tamani atuisut siunnersuisooqatigiivinik pilersitsinissamut periarfissat misissornissai pillugit Naalakkersuisut peqquneqarnissaanik Inatsisartut aalajangiiffigisassaattut siunnersuut. Misissuineq aningaasatigut kingunissaanik nassuiaassaaq UKA2023-lu nallertinnagu tunioraanneqassalluni.
Inatsisartunut ilaasortaq Anna Wangenheim, Demokraatit

Meeqqat ADHD-mik aamma autisme-mik nappaateqartut siusinnerusukkut paasineqartarnissaannut qanoq pitsanngorsaasoqarsinnaaneranut pilersaarummik Naalakkersuisut suliaqaqqullugit peqquneqarnissaannut Inatsisartut aalajangiiffigisassaattut siunnersuut.
Inatsisartunut ilaasortaq Mikivsuk Thomassen, Inuit Ataqatigiit

Pisariartitsineq aallaavigalugu nunalerinermik ilinniarfimmik pilersitsisoqarnissaanut Naalakkersuisut nalunaarusioqquneqarnissaaanik Inatsisartut aalajangiiffigisassaattut siunnersuut. Nalunaarusiaq Narsami Nunalerinermik ilinniarfimmik pilersitsinissamik qulaajaanerussaaq, pingaarnertut imminut pilersorsinnaaneq, nunalerineq aamma nerisassanik tunissassiornermik siunertaqartumik. Nalunaarusiaq Inatsisartut 2023-mi ukiaanerani ataatsimiinneranni agguaanneqassaaq.
Inatsisartunut ilaasortaq Mariane Paviasen, Inuit Ataqatigiit

Meeqqat ADHD-eqartut, ADD-eertut, autismeqartut aammalu/imaluunniit angstertut suussusersineqarnissaat taamaasillutalu ikiorsinnaanissaat qanoq pikkoriffiginerulersinnaanerinut tigussaasunik innersuussuteqartussanik suleqatingiinnik immikkut ilisimasalinnik pilersinnissaanik Naalakkersuisut peqquneqarnissaat pillugu Inatsisartut aalajangiiffigisassaattut siunnersuut. Suleqatingiit immikkut ilisimasallit innersuussutit 1. juni 2023 nallertinnagu saqqummiutissavai.
Inatsisartunut ilaasortaq Nivi Olsen, Demokraatit