Kalaallit Nunaanni Pigisanik aalaakkaasunik arsaarinnissuteqartarneq pillugu ataatsimiititaliaq
Pigisanik imminut pigisassanngortitsinerni periaasissat pillugit Kalaallit Nunaannut inatsit (inatsit nr. 182, 26. maj 1972-imeersoq, inatsisikkut nr. 1013 19. december 1992-imeersukkut allanngortinneqartoq) naapertorlugu Kalaallit Nunaanni Pigisanik aalaakkaasunik arsaarinnissuteqartarneq pillugu ataatsimiititaliaq Angallannermut ministerimit pilersinneqarpoq.
Inooqatigiit ataatsimut iluaqutissaat siunertaralugu Angallannermut ministerip (assartuinermut ministerip) suliassaqarfinni Namminersornerullutik Oqartussanit (Namminersorlutik Oqartussanit) tiguneqarsimanngitsuni Kalaallit Nunaanni pigisanik aalaakkaasunik arsaarinnissuteqarnissamik suliaq aallartissinnaavaa akuersissuteqarsinnaalluniluunniit.
Kalaallit Nunaanni Pigisanik aalaakkaasunik arsaarinnissuteqartarneq pillugu ataatsimiititaliaq tallimanik ilaasortaqarpoq. Naalagaaffiup arsaarinnissuteqarnissaanik isumaginninnittartut arlaat siulittaasuuvoq. Angallannermut ministerip ilaasortaasussat allat marluk ukiuni arfinilinni atasussat toqqassavai, taakkunannga pinngitsoorani ataaseq Kalaallit Nunaanni illuliortarnermik imaluunniit illuliortarnermut tunngasunik paasisimasaqartuussalluni.
Arsaarinnissuteqartarnermut ataatsimiititaliaq immikkut paasisimasaqartunik aggeqqusaqarsinnaavoq.
Pigisanik aalaakkaasunik arsaarinnissuteqartarneq pillugu Inatsisartut inatsisaata nr. 25, 30. oktober 1992-imeersup suliassaqarfinnilu Namminersornerullutik Oqartussanit (Namminersorlutik Oqartussanit) tiguneqarsimasuni inuinnaat pigisaannik arsaarinnissuteqartarnermut tunngasup, akuersissutigineqarnerata kingorna, Pigisanik imminut pigisassanngortitsinerni periaasissat pillugit Kalaallit Nunaannut inatsit malillugu arsaarinnissuteqartarneq pingaaruteqannginnerulersimavoq. Tamatuma erseqqinnerusumik kinguneraa, Angallannermut ministeri (assartuinermut ministeri) aatsaat toqqaasariaqassammat tamatumunnga erseqqinnerusumik pissutissaqartillugu.
Taamaakkaluartoq qinersereernerit tamaasa inissitsiterluni ataatsimiinnermi Kalaallit Nunaanni pigisanik aalaakkaasunik arsaarinnissuteqartarneq pillugu ataatsimiititaliamut Inatsisartut ilaasortanik marlunnik sinniisussanillu marlunnik toqqaaneq ingerlattarpaat. Tamanna pigisanik aalaakkaasunik arsaarinnittarneq pillugu ataatsimiititaliap suliamik aalajangersimasumik suliaqartitaaleriataarnissaanut naapitseriarneruvoq.
Toqqaanerup atuuffia:
Piffissap Inatsisartunit toqqagaaffiup Inatsisartut qinigaaffiat malitaraa. Qinersisoqareernerata kingorna Inatsisartut inissitsiterlutik ataatsimiinneri tamaasa ilaasortanik marlunnik sinniisussanillu marlunnik Inatsisartut toqqaasarput.
Saaffigisassaq:
Ekspropriationskommissionen for Vestgrønland ved Kommissarius for statens ekspropriationer i Jylland, Lyseng Allè 1, 8270 Højbjerg, E-mail post@kommissarius.dk, aamma Angallannermut ministeriaqarfik, oqarasuaat: +45 41 71 27 00.