Dansk tekst mangler*

Anthon   Frederiksen   Uka- 2004-52/01

ulloq,  15. oktober   2004

 

Isumaginninnikkut isumanaallisaaneq pillugu  Nunat  Avannarliit Isumaqatigiissutaata

Nalakkersuisunit  akuersaarneqarnissaanik  peqqusinissamik  Inatsisartut  aalajangiiffigisassaattut  siunnersuutip  siullermeerneqarnera.

 

Kattusseqatigiit  sinnerlugit  imaattumik oqaaseqarfigissuara:

 

Isumaginninnikkut  isumannaallisaaneq  Nunat  Avannarliit  akornanni  isumaqatigiissuteqarsimanerat  aamma  Kattusseqatigiinniit  soqutigisatta  pingaartut  ilaagaat.

 

Taamaattumik-una  aamma  ilaatigut  ullumikkut  oqaluuserisatta   immikkoortup   siuliani  apeqqut  utoqqalinersiallit  siusinaartumillu  sulisinnaajunnaarnersiallit   naalagaaffeqatitta  iluani  assigiimmik  pineqarnissaat  pillugu  siunnersuuteqarsimasugut.  Taassuma  saniatigut aamma  meeqqat  tapisiaqartitaanerannut  tunngatillugu  siusinnerusukkut  naalakkersuisut  saaffiginnissuteqarsimavugut,   Nunatsinni  meeqqat  tapisiaat   naalagaaffeqatitta  iluani  assigiinnginnerujussuat  pillugu,  tassami  Danmark-imi  meeqqat  tamarmik  18-it  tikillugit  ukiullit  ukioqqortussuseq   naapertorlugu  allanngorartunik  tapisiaqartinneqarput,  apeqqutaatinnagu  angajoqqaat  qanoq  akissarsiaqarnersut.

 

Maani  oqaluttuarpugut  meerartavut  pitsaanerungaartunik  atungassaqartinneqartariaqartut,  kisianni  taamaakkaluartoq   Naalakkersuisuniit   saqqummiunneqarneq  ajorpoq   immaqaluunniimmi   takorloorneqarsimanngilaq;  meerartavut  naalagaaffeqatitsinni  Danmark-imi  atungassarititaasutigut  pisortaniit  pineqarnerat  qanoq  ajornerutiginersoq ?

 

Tassa  Nunatsinni  meeqqanut   tapisiat  annertuumik  naalagaaffeqatitsinniit  tunniunneqartartunut   naleqqiullugit   appasinnerujussuupput.

 

Taamaattumik  Isumaginninnikkut  Nunani  Avannarlerni  isumannaallisaaneq  eqqartorneqartillugu  aammalu  isumaqatigiissutip  nutarterneranut  atatillugu Kattusseqatigiinniit  aamma  utoqqalinersianut  meeqqanullu  tapisiat assigiinngippallaannginnissaat  anguniarlugu  Nunat  Avannarliit  naalagaaffeqarterput  Danmark  ilanngullugu  suleqatigiissuteqarnikkut  isumannaarniarneqarnissaat  qularnaarniartariaqartoq,  tassami  taakkununnga  aaqqiissuteqarsinnaaneq  Nunatta  kisimiilluni   nammassinnaanngikkaa  aamma   oqaluuserisap  siuliani  akissuteqaatini  ersersinneqarpoq.

 

Paasinarpoq  Nunani  Avannarlerni  isumaqatigiissut  atuuttoq  maannamut  tamakkiisumik  atuutsinniarnera  ajornartorsiutitaqartoq,  tassami  ukiarmi  tusagassiuutitigut  utoqqaat  Danmark-imiit   Kalaallit  Nunatsinni  illoqarfiit   ilaannut  nuussimasut   maalaaruteqarput;  utoqqalinersiutinik  maani  nunatsinni  pissarsiniarneq   assut  ajornartoorfigisimallugu,  taamaattumik  pissutsit  taamaattut  aamma  soorunami  isumaqatigiissutit  naapertorlugit  ingerlanneqartarnissaat  Naalakkersuisut  eqqumaffiginerusariaqaraat  Kattusseqatigiinniit kaammattuutingaarput.

 

Taamatut  Kattusseqatigiit  sinnerlugit  oqaaseqarlunga  siunnersuut  taamatut  isikkoqarluni  akuersaartumik  aappassaanneerneqarnissaminut  ingerlateqqinneqarnissaa  inassutingaara.