Samling
Dansk tekst mangler
Anthon Frederiksen Uka-2004-30-01
|
ulloq, 22. september 2004 |
Inatsisartut Naalakkersuisullu pillugit inatsisartut inatsisissaannut siunnersuusiortussamik suleqatigiisitaliamik pilersitsinissaq aammalu suleqatigiissitaliamut suliassarititat akuerineqarnissaat pillugu inatsisartut aalajangiiffigisassaattut siunnersuutip siullermeerneqarnera.
Inatsisartut Naalakkersuisullu pillugit inatsisartut inatsisaata allanngortinneqarnissaanut siunnersuummut immikkoortoq 21. imik normulerneqaraluartumut taarsiullugu tassanngaannaq suleqatigiisitaliornissamik isummeriasaarneq ippassaq ataatsimiinnitsinni ullormut oqaluuserisassat allanngortinnerannik aamma kinguneqartoq saqqummiunneqariasaarpoq.
Apeqqusertariaqarpoq ilumut Naalakkersuisut taamatut suleriaaseqarneq suleqatigiilluarnissamik paaseqatigiilluarnissamillu oqariartuutaannut naapertuunnersoq, tassami suliassat suulluunniit piffissaangallartillugu agguaanneqareersut ullormiit ullormut allanngortinneqartarneri Inatsisartuni sulinitsinnut toqqissisimanermik suliassanillu suliarinninnermut piffissaajaataaginnaratik ajoraluartumik aamma Naalakkersuisut tatiginassusaannik innarliisinnaapput.
Tassami suliassaq siulleq 17.-inik quppernilik suliarereerlugu saqqummiunnissaanut piareereerlugu ullormiit ullormut taamaatinneqarnera allamillu taarserneqarnera suliakkiisuniit, tassa Naalakkersuisuniit pilersaarusisornerlunnertut oqaatigineqartariaqarpoq, tassami Naalakkersuisut suliassaq ukiup ataatsip missaani piareersaasiornissaanut piffissaqarsimapput, kisianni periarfissaq tamanna atorluarneqarsimanngitsoq paasinarpoq.
Taamaakkaluartoq allatut ajornartumik maanna siunnersuutigineqartoq Naalakekrsuisut namminneq naammassisinnaanngimmassuk Kattusseqatigiit sinnerlugit suleqatigiisitaliassatut siunnersuutigineqartut taakkununngalu suliassarititassat akuersaarlugit ingerlateqqinneqarnissaat inassutingaara.
Taamatut oqaaseqarlunga suliap aappassaanneerneqannginnerani Inatsisartut Inatsisit atortinneqarnerannut ataatsimiititaliami suliarineqarnissaa inassutingaara.