Samling
29. april 2005 UPA 2005, 70.1
Ane Hansen
Imaatigut angalanermi puttaqutinik atuisussaatitaanerup kikkunnut tamanut imaatigut angalasunut atugassanngortillugu sukateriffigineqarnisaa, kiisalu atallaanik puttassinnaasunik aammalu imaatigut angallannermi ajutuulernermi sillimmatitut nassarneqarsinnaasut tunngavigalugit inatsisip sukateriffigineqarnissaa piumasaralugu Naalakkersuisut suliniuteqaqqullugit Inatsisartut aalajangiiffigisassaattut siunnersuut.
(Inatsisartuni ilaasortaq Isak Davidsen, Siumut)
Inatsisartuni ilaasortaq Isaq Davidsen siunnersuuteqarpoq imaatigut ajutoortarnerit annikillisarnissaat siunertaralugu inatsisit atuuttut sukateqqullugit Naalakkersuisut suliniuteqaqqullugit peqquneqassasut.
Inuit Ataqatigiinniit Inatsisartuni ilaasortaq Isaq Davidsen isumaqatigilluinnarparput oqarmat nunatsinni imaatigut ajunaartartut amerlavallaartut aammalu imaatigut ajunaartartut ikilisarnissaat siunertaralugu suliniuteqartoqartariaqartoq.
Imaatigut angalasunik ajunaartoqaraangat nunaqqataasut tamarmik minnerunngitsumillu ilaqutaasut alianaqisumik eqqorneqartarput, taamaattumik aamma Inuit Ataqatigiinniit isumalluarfigaarput Naalakkersuisut imaatigut ajunaartarnerup pinaveersartinnissaa siunertaralugu suliniuteqarlutik aallartissimammata, neriuutigeqaarpullu suliniuteqarluni aallartissimaneq tamanna kinguneqarluarumartoq.
Ullumikkut imaatigut angalanermi inatsisit imartoorujussuaq malittarisassarpassuarnillu imaqartoq pigineqarpoq, tamaattumik aamma tupinnanngittumik malitsinniarnera nunatsinni ajornartorsiutaasartoq paasivarput. Inatsit taanna malillugu malittarisassarpassuit akornanni imaatigut angalanermi puttaqutinik atuisussaatinaaneq kikkunnut tamanut atuuttussaatitaasoq piugaluarpoq, tamatigulli malinneqarani.
Taamaattoqarnerata takutippaa ullumikkornit annertunerusumik imaatigut angalanermi inatsisit malittareqqusaasunik paasisitsiniaanissaq annertusartariaqartoq.
Ukioq manna aningaasanik inatsimmi 420.000 kr.-nit immikkortinneqarnikuupput imarsiornermi isumannaallisaanissaq pillugu paasisitsiniaanermut atugassat, tamatumani immikkut umiatsiararsorlutik angalasut samminiarneqarmata angusaqarfilluarnissaa isumalluarnarpoq.
Taassuma saniatigut Inuit Ataqatigiinniit iluarisimaarparput Naalakkersuisut inatsisip atuuttup nunatsinnut naleqqussarneqarsinnaanera siunertaralugu Qallunaat Nunaanni Naalakkersuisunik oqaloqarteqarlutik aallartissimammata.
Siunnersuummut Naalakkersuisut iliuuserisaat aammalu iliuseriumaagaat innersuussutigalugit, pisariaqassappallu inatsimmik sukaterisoqarnissaa aamma inassutigalutigit, iliuuseriniakkat isumaqatigigatsigit oqaatigissuarput.
Upernaakkut ataatsimiinneq 2005
Ullormut oqaluuserisassat kiisalu ullut suliarineqarfissaat