Samling
|
Tlf. 299 34 61 11 / 34 62 52 - fax 299 32 62 35 Postboks 74, 3952 Ilulissat - tlf./ fax 299 94 47 53 |
|
Anthon Frederiksen UPA 2006-10-02 |
Ulloq 9 Maj 2006 |
Inatsisartut 2005-imut ilassutitut aningaasaliissutinut inatsisissaannut siunnersuutip aappassaanneerneqarnera.
Ilassutitut aningaasaliissutinut inatsisissap siullermeerneqarnerani Kattusseqatigiit partia sinnerlugut oqaaseqaatikka innersuussutigalugit, suliap aappassaanneerneqarnerani aningaasaqarnermut ataatsimiititaliap isumaliutissiissutaa pingaarnersiuiffigalugu imaattumik oqaaseqaateqassuunga:
Siullermik puisit amiinut tunngasut pillugit aningaasaqarnermut ataatsimiititaliap isumaqatigiittup naalakkersuisunut piumasaqaata imaattoq qanoq Naalakkersuisunit naammassineqarsimanersoq apeqqutigeqqaarniarpara, tassa ataatsimiititaliaq imannak allammat:
"Taamaattumik immikkoortumi ingerlatat nukissallu atukkat pitsaanerusumik aqutsivigineqarnissaannik ersarilluinnartumik pisariaqartitsineq nassuerutigalugu Aningaasaqarnermut Ataatsimiititaliamit piumasaqaatigineqarpoq sullissinissamik isumaqatigiissut pilluigu Great Greenlandimik piffissami aggersumi isumaqatiginninniarnissami tunisinermi tapiissutinik tunniussisarnerup eqaannerusumik naapertuunnerusumillu 2006 aallarnerfigalugu ilusiliivigineqarnissaa Naalakkersuisut qulakkiissagaat".
Aamma Arctic Umiaq Line A/S-ip tununiarneqarneranut atatillugu Arctic Umiaq Linemi tjenestemanditut atorfillit 19-it soraarsinneqarnissaannut aningaasatuutissatut naatsorsuutigisat pillugit Aningasaqarnermut Atatsimiititaliaq sulimi matumani aalajangiinermini ilaatigut Naalakkersuisunut ima allappoq:¿
"Anguniagaq tassaasariaqarpoq pineqartut suliffeqarnermut attuumassuteqaannarnissaasa qulakkeerneqarnissaa, tamatumalu peqatigisaanik pi9areersimanermut atatillugu ukiunut pingasunut akissarianik aammalu soranerussutissiassanut ikkikkut akileeqataassutissanik Landskarsip sipaaruteqarnissaa. Naalakkersuisut assersuutigalugu pisortat A/S-iutaat Paamiuniluunniit Naalaganngorniat Ilinniarfiat aqqutigalugu suliffissanik allanik naleqquttunik pissarsiniartariaqarput. Taamatuttaaq isumaqatigiissutit tunngavigalugit maanna sulisorineqartut tjenestemandit eqqorneqartut ilaannik taarserneqarsinnaanerat periarfissaanersoq misissorneqartriaqarpoq. Tamanna pillugu maanna Naalakkersuisuusut Naalakkersuisunngorumaqartullu annertuumik suliniuteqarnissaat Aningaasaqarnermut Ataatsimiititaliamit ersarissumik naatsoruutigineqarpoq. Taamaattumik suliniutit taakku killiffiat pillugu paasissutissanik 31. december 2005 tikitsinnagu pissarsisineqarnissani ataatsimiititaliap qinnutigaa".
Taassuma ataani ataatsimiititaliaq ima nangilluni allappoq:
"Naalakkersuisut akissuteqaataat suli tiguneqanngimmat, taassuma piaartumik tiguneqarnissaa ataatsimiititaliap matumuuna qinnutigissavaa "!
Isumaliutissiissut pisoqalereersimasutut nalilerneqarsinnaangaluartoq taamaattoq qulaani apeqqutinut tunngasut erseqqissaavigineqarnissaat kissaatingaara.
Taamatut oqaaseqarlunga 2005-imut aningaasaliissutinut ilassutissatut siunnersuut taama isikkoqarluni pingajussaanneerneqarnissaa inassutingaara.