Ullormut oqaluuserisassat

Ullormut oqaluuserisassanut nassuiaat.

Nakorsat namminersortut nakorsiartarfimmik ingerlatsinissaminnut inatsisitigut allatigullu aporfigisinnaasartagaannik Naalakkersuisut UKA2019-mut misissueqqullugit peqquneqarnissaannik Inatsisartut aalajangiiffissaattut siunnersuut. Misissuinermilu siunnersuutigineqassaaq aporfiusinnaasut qanoq aaqqinneqarsinnaasersut.

Nunat Avannarliit Killiit Siunnersuisoqatigiiffiata Savalimmiuni, Kalaallit Nunaanni aamma Islandimi Naalakkersuisut nunat akornanni sammisami timersornermut tunngasumi suleqatigiinnerup annertusarneqarsinnaaneranik mississueqqullugit kaammattorpai.

Nunat Avannarliit Killiit Siunnersuisoqatigiiffiata Savalimmiuni, Kalaallit Nunaanni Islandimilu Naalakkersuisunut kaammattuutigaa nunani avannarlerni killerni oqaatsit siunissaat pillugu suleqatigiinnissaq anguniarlugu pisortatigut oqaloqatigiittarfimmik pilersitsisoqassasoq. Suleqatigiissitamik nunanit ataasiakkaanit aallartitanik inuttalikkamik pilersitsineq alloriarneq siulliussaaq. Nalunaarusiamik nunani ataasiakkaani oqaatsit inissisimanerannik takussutissiiffiusumik siunissamilu periarfissaat pillugu allaaserisanik imaqartumik suliaqarnissaq suleqatigiissitap suliassarissavaa, tamanna pingaartumik qarasaasiarsornikkut ineriartorneq maanna atuuttoq tunngavigalugu.

INI A/S-ip, Illuut A/S-ip kiisalu Namminersorlutik Oqartussat illuutaannik aallaqqaataasumik akiliutigineqartartut kattunneqarnissaat pillugu Naalakkersuisut UPA2020-mut pilersaarusioqqullugit peqquneqarnissaannik Inatsisartut aalajangiiffissaattut siunnersuut.

Tamanut ammasumik tusarniaanerni ammanerunissap qulakkeerneqarnissaanik Naalakkersuisut peqquneqarnissaannik Inatsisartuni aalajangiiffigisassatut siunnersuut. Minnerpaamik tusarniaanernut najoqqutassanik tamanit pissarsisinnaanisssaat qulakkeerneqassaaq.

Peqquserluuteqartarnerup akiorniarnerani suliniutit qanoq nukittorsarneqarsinnaanerat pillugu UKA 2019-mi nassuiaammik innersuussutitalimmik agguaasseqqullugit Naalakkersuisut peqquneqarnissaanik Inatsisartut aalajangiiffigisassaattut siunnersuut. Nassuiaammi aamma allaasereqquneqarput iluaqutissat ajoqutillu aamma aningaasatigut kingunissat inatsisitigullu tunngavissat, arlaannaannulluunniit attuumassuteqanngitsumik Peqquserlutsaaliuisussanik pilersitsisoqassasuuppat taamatullu aamma peqquserlutsaaliuisussat pillugit inatsisiliortoqassasuuppat, peqquserluuteqartarnerup akiornerani suliniutinik katersiviusussamik.

Immikkoortortamut arlaannaannulluunniit naammattumik attuumassuteqanngitsumut whistleblowerit pillugit misissuineq nooqqullugu Naalakkersuisut peqquneqarnissaanik Inatsisartut aalajangiiffigisassaattut siunnersuut.

Ataatsimoorluta pisuussutitta uuliap, atortussiassaatitta, imiutitta nukissiutitta-lu qanoq iliorluta sakkortunerusumik pilerisaarutigisinnaanerigut pillugu apeqquteqaat allaavigalugu oqallinnissamik siunnersuut.

Angajoqqaat atugarisaannik ilisimasaqarfimmik qitiusumik katersuiffeqalernissaanik pilersitsisoqarnissaanik apeqquteqaat aallaavigalugu oqallisissiatut siunnersuut. Oqallisissiatut siunnersuutip siunertarissavaa angajoqqaat atugarisaanik ilisimasanik katersuiveqalernerup kingunerisaanik Angajoqqaat illersuisuanik pilersitsinissamut tunngavissaqalernissaq.